لميس الحديدي تكشف تفاصيل الحالة الصحية للإعلامي عمرو أديب

طمأنت الإعلامية لميس الحديدي الجمهور على الحالة الصحية للإعلامي عمرو أديب بعد تعرضه لحادث مروري مساء الثلاثاء الماضي.

وقالت الحديدي عبر برنامجها "كلمة أخيرة" المذاع على قناة "ON"، اليوم السبت: "عاوزه أتكلم في موضوع مالوش علاقة بالشغل، عاوزة أطمن كل الناس اللي بتسأل على عمرو بعد الحادثه الصعبة اللي تعرض لها مساء الثلاث الماضي، أنه الحمد لله بخير بشكل عام ربنا نجاه بأعجوبة الحقيقة لأن العربيه اللي خبط فيها واللي وقفت فجأة، كانت محملة بانابيب بوتاجاز فكان ممكن تنفجر في أي لحظة".

تابعت: "الدكاترة طمنونا على حالته عموما، لكن هو لسه بيعاني من الام مبرحة غالبا من الكدمات والردود نتوقع انها تاخد بعص الوقت، وإن شاء الله يحاول يرجع لجمهوره قريبا بإذن الله، لكن هو محتاج يستريح شويه علشان يقدر يرجع تاني، وانا طبعا ماكنتش هقدر انزل الشغل أو أكون معاكم إلا وأنا مطمئنة عليه انه بيتماثل للشفاء وأن حالته تسمح أني اسيبه بعض الوقت، لأن في مثل هذه الاحداث دوري كزوجة بييجي قبل دوري كإعلامية ".

وجهت الإعلامية الشكر للجمهور ولكافة المسؤولين في الدولة قائلة: " عاوزة أشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد بشكرهم جميعا، زملاءنا الإعلاميين، الفنانين من كل الوطن العربية، الدكاتره اللي كانوا بيكلموني، والمستشفي اللي انقذت عمرو في اللحظات الأولى، وطبعا أصدقائي وأصدقاء عمرو اللي ماسابونيش لحظة واحدة.

وتابعت:"بعتذر اني ماكنتش برد على الاتصالات، لكن ممتنين جدا لاهتمامهم، وحبهم اللي حسينا بيه".

كشفت لميس الحديدي لأول مرة عن هوية أربعة شباب كان لهم دورًا كبيرّا في إنقاذ زوجها الإعلامي عمرو أديب للمستشفى وإنقاذه، قائلة: " أنا هنا سأخص بالشكر 4 شباب بالاسم لانهم هم دول اللي نقلوا عمرو المستشفى بعد الحادث مباشرة وفضلوا معاه لحد ماانا وصلت مباشره بعد الحلقه يوم الثلاثاء، لمهندس مصطفى عزب، الدكتور كريم النحاس، دكتور طارق سلامة، المهندسة داليدا. الشباب دول انا مااعرفهومش، لكنهم تصادف وجودهم في نفس مكان الحادث ونقلوه المستشفى وفضلوا معاه لحد وصولي وكملوا معايا لحد ما اتطمنوا عليه، الشباب دول أنا صممت اخد أساميهم علشان اشكرهم بنفسي، فيه لسه ناس محترمه بجد".

يذكر أن برنامج "كلمة أخيرة" تقديم الإعلامية لميس الحديدي ويذاع من السبت إلى الثلاثاء في تمام التاسعة على شاشة "ON".