ياسمين عز تتغزل في الزوج الصيدلي: مرهم يطيب جروحك وعارف القرد مخبي ابنه فين| فيديو

تغزلت الإعلامية ياسمين عز، الزوج الصيدلي، ضمن عنوان دروس تفخيم الزوج، قائلة: "عمرك شوفتي واحدة اتجوزت صيدلي وقالتلك إنها ندمانة على الخطوة دي؟ مستحيل".

وقالت ياسمين عز خلال برنامجها “كلام الناس” الذي يعرض عبر قناة “MBC مصر”: "عمرك سمعتيها بتقول كان يوم مالوش ملامح يوم ما اتجوزتك؟ مستحيل ده كان يوم ملامحه قمر بدر منور اتحداكي على الهوا، ببساطة لإنها متجوزة راجل نسمة بلسم صيدلي، آية في الطيبة والأخلاق والذوق العالي الرفيع”.

وذكرت: "بنسمع جملة إن الواحد بيكون له نصيب من اسمه، أنا ياسمين ليا نصيب من اسمي طالعة ياسميناية، أهو المثل ده بينطبق على أي حد إلا الصيادلة، لإن الصيدلي مش بس بيكون له نصيب من اسمه لا، لكن كمان له نصيب من مهنته، تحسيه دوا كده في نفسه مرهم يطيب جروحك".

وأضافت: "خلي بالك الزوج الصيدلي ده فيه ميزة مش موجودة في أي راجل، كل يوم بتعدي عليه روشتات أشكال وألوان مكتوبة بخطوط غريبة، يعني هتلاقي الصيدلي كده عنده قدرة عجيبة وخارقة وغير مفهومة لفك شفرة أي مشكلة تضايقك أو تزعلك، فبالتالي مش هيبقى محتاج يسألك مالك وانتي تقوليله ماليش".

وعن مزايا الزوج الصيدلي: " "من مزاياه اللي المفروض تحمدي ربنا عليها إنه منظم بشكل نادر، ومش هيتعبك ويسألك فين القميص وفردة الشراب، حياته كلها أدراج أدراج، رفوف رفوف، ألوان ألوان، وعارف القرد مخبي ابنه فين".