دعاء أمام محكمة الأسرة: «نفسي أشتري قلم روج وكريم مرطب»

رفعت« دعاء » دعوى طلاق للضرر أمام محكمة الأسرة مدينة نصر اتهمت فيها زوجها برفضه منذ بداية زواجهما إعطاءها مصروفا شخصيا لها بجانب مصروف البيت.

حكيت «دعاء» في دعواها أمام محكمة الأسرة: قبل الجواز كنت حريصة جدا أني متجوزش راجل بخيل وأي حد يتقدم لي كنت لازم أتأكد الأول هو بخيل ولا لا، ونفسي أجيب روج أو كريم مرطب خصوصا أني من أسرة ميسورة الحال، وطول عمري عايشه مرتاحة عند أهلي وبالرغم أني كنت بشتغل بس كانوا هما بيصرفواعليا متكفلين بكل مصاريفي وكل حاجة عايزها.

وأكملت «دعاء»في دعواها أمام محكمة الأسرة : لما أتقدم لي زوجي أقنعني إني أسيب شغلي لأني مش محتاجه في حاجة خصوصا إن حالته المادية كويسة جدا وبيشتغل مع والده في التجارة فوافقت على أساس أنه يلبي كل احتياجاتي وفعلا مش هكون محتاجة الشغل.

كما اختتمت الزوجة الحزينة في دعواها أمام محكمة الأسرة : كان في الخطوبة بيجبلى كل حاجه أنا عايزاها في تجهيزات البيت وحتى بعد الجواز، كان بيتنا لا ينقصه شيء، ولما بدأت الحاجات الشخصية بتاعتي تخلص طلبت منه يديني فلوس «مصروف شخصي»، لكن رده كان صدمة بالنسبة لي، فقال لي أن ذلك ليس من حقي شرعا ولا قانونا، فأخبرته بأنني سأعود مرة أخرى لشغلي لكي أصرف على نفسي ومستلزماتي لكنه رفض رفضا تاما وقال لي إنتي شغلك إنك تقعدي في البيت تشوفي طلباتي وطلبات بيتك وبس مفيش نزول من البيت.

وعندما طلبت الطلاق رفض وساومني على التنازل عن كل حقوقي الشرعية. وهو ما دفعني للتوجه إلى محكمة وإقامة دعوى طلاق للضرر.