ياسمين عز للسيدات: «سيبي مسافة بينك وبين جوزك ومتدوسيش على ضله»

وجهت الإعلامية ياسمين عز، نصيحة إلى السيدات في عيد الحب على طريقتها الخاصة، خلال برنامجها "كلام الناس" المذاع عبر قناة "mbc مصر"، مشددة على ضرورة الاحتفال بالرجل، تقديرًا لمجهوده طوال العام.

وأوضحت: "عيد الحب للراجل، تقديرًا لمجهود طول السنة، وأنا هسميه عيد حب الراجل، وبلاش تنكدي على جوزك عشان متبقيش ملعونة، وحبي تراب رجله وقوليله حاضر 365 يوم، وبوسي راس جوزك ومتنتظريش هدية؛ لأن فرعونك الجائزة الكبرى".

وذكرت: "الراجل عنده قلبين واحد في صدره والتاني في رجله الخلفية ومتراجعيش ورايا ولو عايزة تتأكدي أسألي دكاترة القلب، يعني حفنة التراب اللي بيمشي عليها دي هدية من قلبه ورجله، والراجل عيونه هي الفيونكة وراسة الهدية".

وتابعت: "سيبي مسافة بينك وبين جوزك عشان متدوسيش على ضله، لأن علميًا ممكن يتوجع ويتأثر نفسيًا، وبصيله بنظرة المثلث المقلوب من تحت لفوق برقة ودلال ودي عكس نظرة المثلث العادي اللي بنعملها لما بنتضايق من شخص، والراجل هو تاج راسنا ومنبع العسل والسكر وتراب رجله بالدنيا، وتعبان وشقيان طول السنة وبيجيب هدايا بدون مناسبة".

ونصحت الرجال قائلة: "يا فرعون يا تاج الراس يا فرحة حزننا ونعمة ربنا، فرعونا مفيش منه، وحفنة من تراب الراجل بالدنيا، جيب لمراتك حفنة تراب من تحت رجلك في منديل حرير، ولو تعرف قيمتك هتعرف قيمة التراب اللي ماشي عليه، لو هي جعفر هترمي الهدية ودا اختبار وسقطت فيه".