تامر أمين يعلق على واقعة شيرين: اقفلوا المايك عليها (فيديو)

علق الإعلامي تامر أمين على أزمة تصريحات الفنانة شيرين عبد الوهاب الأخيرة، خلال حفلها الغنائي في الكويت بالأمس.

وقال الإعلامي تامر أمين، خلال تقديمه برنامج "آخر النهار" لقناة"النهار": "ما حدث هو زلة لسان غير مقصودة تحدث لأي شخص، كلنا بنغلط، وممكن أقول كلمة مكان كلمة وأنا على الهواء، دي حاجة عادية طالما في حسن نية".

وأضاف تامر أمين: "ما حدث مع شيرين في حديثها عن محمد رحيم زلة لسان، ومع ذلك الناس مسكتها سلخ وجلد، وأنا في رأيي بقى فيه انحيازات وقسوة في الحكم والتقييم للناس".

وتابع الإعلامي عبر قناة النهار: "أنا مستغربها حد في ظروف شيرين اللي عارفينها، ودي أول حفلة ترجع فيها، نسندها ونطبطب عليها ولا نستنى غلطة عشان ندبحها ونخلص عليها خالص؟".

تامر أمين لشيرين: غني وأوعي تتكلمي

وأردف: "واضح أنها زلة لسان.. أرجو يكون في نوع من أنواع الرحمة، بقول لشيرين، أبوس إيدك هو أنتي لازم تتكلمي، غني بس يا ست البنات، أنتي لو غنيتي بس هتبقي ملكة لا يضاهيكي أحد".

وأشار: "اتفقوا مع مهندس الصوت اللي معاها لما تخلص الأغنية تقفلوا المايك، يا مهندسي الصوت في حفلات شيرين احموا شيرين من شيرين".