"هتنسي أكتر ما أنا منسي".. رسالة مأساوية من حمادة صميدة بسبب تهميشه

وجه الفنان حمادة صميدة رسالة محزنة مساء اليوم السبت لجماهيره، بسبب ابتعاده عن الساحة في السنوات الأخيرة.

رسالة حمادة صميدة لجماهيره

وكتب حمادة صميدة في رسالته: "أنا والله حبيت افضفض معاكم وأعرفكم عن تجارب أنا حاليا عايشها، لأني أنا حرفيا بموت وبقيت مركون في رف من أرفف دولابي".

وأضاف صميدة: "والله أنا بحاول اتكلم بس مش عاوز أشيل الناس همي، والناس تقول ده بيشتكي، والله بقالي كتير قوي عاوز اتكلم وافضفض بس خايف يقولوا ده بيشتكي ويفهموني غلط، وازعل حد مني، رغم أن بحب كل الناس".

صميدة: حسيت إني هقدم

وتابع حمادة صميدة: "ومش عاوز حد يزعل مني وبحب الخير لكل الناس قبل مني وراكنتي اللي بقالها كام سنه منسيه وحسيت اني هاقدم وهتنسي اكتر منا منسي، أنا نفسيا متدمر، اقسم بالله ولكن الحمدلله يمكن ده اختبار من ربنا لكن ربنا يعلم اني معاه جدا، أنا الحمدلله اتغيرت عن الأول لكن للأسف بقيت من كتر الوحده بقيت احس اني خلاص هموت".

وأردف: "والله نفسيا تعبان جدا وخايف اتكلم واقول اني محدش بقي بيرد عليا زي الاول واني اتركنت من ناس كتير في الشغلانه مش عارف هما نسيوني ولا اي أنا بسعي والله وعشان اوصل للوكيشن بقيت اكلم عامل بوفيه او عامل اضاءه او مساعد ممثل أنا والله اللي ف داخلي لايتشاف ولا يتحكي الحمدلله أنا كتبت البوست ده ذكري لاني عارف أنا ممكن بكره مبقاش معاكم في الدنيا ف حبيت أعرفكم ان ده السبب للي أنا فيه والحمدلله".