" المخرجين بيكرهوا المحجبات".. عنايات صالح تكشف سر غيابها عن الأعمال الدرامية

كشفت الفنانة عنايات صالح عن سر غيابها عن الظهور  في الأعمال الدرامية والسينمائية في الفترة الماضية.

وأكدت الفنانة عنايات أثناء  لقائها في برنامج "قعدة ستات" من تقديم مروة صبري: "أنا لبست الحجاب والمخرجين عندنا بيكرهوا الحجاب عندهم مشكلة، كان زمان المخرج يروح المسرح والمعهد يشوف الشباب ويختارهم للأدوار، لكن دلوقتي الموضوع اختلفت النجم هو اللي بيختار".

وأضافت في حديثها "  "أنا محجبة بقالي 3 سنين، كنت بشتغل 3 أو 4 مسلسلات في السنة، وبعد الحجاب قعدت في البيت ولا حد بيتصل بيا، النجوم الجديدة ميعرفوناش، أنا اشتغلت مع كبار المخرجين دلوقتي يقولوا تعالي أعملي اختبار أداء".

وأكملت" أروح أعمله مع مخرج مساعد إزاي وأنا اشتغلت مع مخرجين كبار، عديت المرحلة دي من زمان، لكن قلت أجرب رحت لقيت 2 قاعدين صغيرين في السن وكاميرا وخدي المشهد دا قوليه عشان يشوفوا أنفع ولا لأ، أنا زعلت من نفسي أني رحت".

وعن بدايتها ،أجاب  أنها كانت تقدم دائما دور الأم لأنها كانت ترفض أدوار الإغراء " أنا بعمل دور الأم من وأنا عندي 25 سنة، لأني مولده في سيدنا الحسين وأبويا كان شيخ جامع مكنش ينفع ألبس مايوهات".

وأجابت" بقيت بعمل دور الأم من وأنا صغيرة أوي لناس أكبر مني في السن، المهم أبقى لابسه محتشم، زمان كان يا توافقي تعملي أدوار فيها رقص ومايوهات يا تعملي أدوار الأمهات على قدك وأنا اخترت دا".

وأوضحت "  "اتعرض علي كتير أعمل أدوار إغراء وأنا طالبة في المعهد وموافقتش كنت خايفة من أهلي، وبقى دا أسلوب طول حياتي".

وأضافت " اتعرض عليا دور يعتبر بطولة بس كان فيه أربع مشاهد في السرير أنا رفضت، أكيد لو كنت قبلت الأدوار دي كنت هبقى في مكان تاني".

وشددت " أنا استبعدت من مسلسلات كتيرة جدا بسبب المعاكسات، وأنا طالبة في المعهد جيه مخرج من الكبار بتوع السينما وقالي تعالي إنتي هند رستم الجديدة، وقالي هنعدي نروح مدينة السينما يعملي تيست كاميرا".

وأنهى حديثه" وبدأ يقولي عندك بطن عايزة تنزل شوية وبدأ يحط إيد على بطني وحاول يتحرش بيا، وأنا زعت واتخانقت معاه، ومخرج تاني كبير أوي طلب مني أروحله المكتب بتاعه عشان اقرأ السيناريو معاه  واكتشفت أنه مش مكتب أنه بيته فمروحتش".