أحمد السعدني يتحدث عن كواليس "لام شمسية" وتأثيرها على حياته

كشف الفنان أحمد السعدني عن تجربته في مسلسل "لام شمسية"، الذي يجمعه لأول مرة مع الفنانة أمينة خليل، ويعرض ضمن السباق الرمضاني 2025.

وأعرب عن سعادته الكبيرة بنجاح العمل منذ عرض أولى حلقاته.

رأي السعدني في المسلسل وردود الأفعال

وعن المشاهدة الأولى للعمل، قال: "أول مرة اتفرجت على المسلسل كان وقت عرضه، وبعد الحلقة الأولى كلمت المخرج كريم الشناوي وقلت له: العمل ده عظيم، وبقيت أتابع ردود الفعل وأقرأ كل حاجة."

وأضاف: "الدور اللي بقدمه يمثل الغالبية العظمى من الرجال في الوطن العربي، مش في مصر بس."

مشاهد صعبة وتجربة تمثيلية مؤثرة

وتابع السعدني: "لما شفت مشهد معرفة طارق بتعرض ابنه للتحرش، ما عرفتش إزاي عملته! التوفيق من عند ربنا، وكان من أصعب المشاهد اللي صورتها."

وواصل: "دوري في "لام شمسية" هو أصعب دور قدمته في حياتي، رغم أني عملت أدوار كتير صعبة، لكنه كان الأصعب على الإطلاق."

وأردف: "أنا وأمينة عندنا إفيه في الكواليس، وهو أن اللي معندوش مشهد صعب أو مشهد عياط لازم يبارك للي عنده، لأن مفيش حد بيضحك في المسلسل."

إشادة بالمواهب الشابة

وأشاد السعدني بالطفل علي البيلي صاحب شخصية يوسف في المسلسل: "أنا بعتبر علي البيلي نجم رمضان الأول، مش بس على المستوى الفني، لكن كإنسان كمان، هو شخص واعي جدًا وفاهم، ربنا يحميه."

تأثير المسلسل على حياته الأسرية

"اتكلمت مع ابني عبد الله عن فترة البلوغ لما بدأ يدخل سن المراهقة، وناقشته في كل الأمور الخاصة بالمرحلة اللي داخل عليها، وعمري ما تخيلت إني هعمل حاجة زي كده."

وأوضح: "ابني الصغير ياسين اتفرج معايا على أول حلقة، وفي المشهد الأخير قال لي: "يا بابا إنت بتعمل إيه؟"، فقعدت أفهمه كل حاجة بدل ما أعمل قعدة مخصوصة، وده يوضح قيمة الفن، إنه يسهل توصيل المعلومة بشكل كبير."

"لام شمسية".. دراما قوية تطرح قضايا مجتمعية

أثبت مسلسل "لام شمسية" نجاحه الكبير، بتقديمه قضايا مجتمعية حساسة ومعالجة درامية واقعية، مما جعله حديث الجمهور والنقاد خلال الموسم الرمضاني 2025