والد زيزو عن توقيعه مع الأهلي : " أنا حر.. وصبرنا كتير على الزمالك"

أحمد السيد زيزو

قال مصطفى زيزو، والد أحمد مصطفى زيزو لاعب نادي الزمالك، إن استبعاد نجله من مباراة الفريق أمام بطل جنوب أفريقيا بسبب توقيعه للنادي الأهلي في مارس الماضي ليس أمراً مفاجئاً.

وأضاف: "ده شيء طبيعي، يختاروا اللي يلعب براحتهم، وميدو ممكن ينزل بكرة يلعب مكان ابني، لأنه المسؤول الأول عن تطفيشه، وهو اللي بيدير النادي حالياً مش حسين لبيب".

وخلال مداخلة هاتفية ببرنامج "ستاد المحور" مع الإعلامي خالد الغندور، أوضح مصطفى زيزو: "ابني مش هينتحر ولا هيحصل له حاجة بسبب التجميد، هو بس محتاج يريح أعصابه، واسألوا شيكابالا، ابني طلب منه يتواصل مع الإدارة من شهور علشان ملف التجديد، لكن محدش تحرك".

وتابع: "لو الإدارة مش عايزة تجدد لابني أو مش شايفين إنه يستحق التقدير كنجم حقق بطولات مع الزمالك، يطلعوا ويقولوا كده بصراحة قدام الناس. والانضمام للأهلي مش حرام، ومش لازم أطلع أقول إني وقعت أو عملت اتفاق مع أي نادي".

وشدد" إحنا صبرنا كتير على مجلس حسين لبيب، لكن مفيش أي خطوة حقيقية اتعملت، وأنا مش هطلب رضاهم علشان يتعاملوا بشفافية في ملف التجديد".

واختتم والد زيزو حديثه قائلاً: "في المجلس ناس محترمة زي هاني بيرزي، وعمرو أدهم، وحسين السيد، لكن للأسف تم استبعادهم من ملف زيزو لأنهم رفضوا تسليمه للجمهور، وكانوا بيحاولوا يحافظوا على حق اللاعب".