أسماء أبو اليزيد: "كان نفسي أتعلم باليه.. وضرب أحمد مجدي في (فات الميعاد) مكنش حقيقي"

كشفت الفنانة أسماء أبو اليزيد خلال لقاء إذاعي عن كواليس مشاركتها في مسلسل "فات الميعاد"، وتفاصيل تعاونها المتجدد مع الفنان أحمد مجدي، بالإضافة إلى رأيها في بعض القضايا الاجتماعية وتجربتها الفنية المقبلة.

وقالت أسماء: "كان نفسي أتعلم رقص الباليه، بس للأسف فات الميعاد. أنا بحب أي حاجة فيها رقص، وفكرة الرقص عمومًا قريبة مني جدًا."

وأضافت عن مسلسلها الأخير: "مسلسل (فات الميعاد) حدوتة حقيقية وموجودة في بيوت كتير حوالينا. الشخصيات مكتوبة بشكل واقعي جدًا وشبه ناس نعرفهم. اختيار السيناريو بالنسبة لي دايمًا توفيق من ربنا، ولما بلاقي حاجة مشدودة ليها بعملها حتى لو منجحتش، بكون مبسوطة إني خضت التجربة."

وتحدثت عن ردود أفعال الجمهور قائلة: "مكنتش حاطة أي توقعات، لكن من أول حلقة الناس تفاعلوا مع المسلسل بشكل كبير، وده عدى التوقعات والحمد لله."

وبخصوص مشاهد العنف الجسدي التي جمعتها بأحمد مجدي، أوضحت: "الضرب اللي في المسلسل مكنش حقيقي، وكنا واخدين بالنا جدًا إنه يطلع واقعي من غير ما يوجع. في كيميا وصداقة حلوة بيني وبين أحمد، وعارفين كويس إحنا بنعمل إيه."

أما عن رؤيتها الشخصية لقضية العنف ضد المرأة، فقالت: "صعب أني أنصح ست بتواجه العنف، لأن كل واحدة ظروفها مختلفة. اللي أقدر أقوله إن الست لازم تحط حدود لنفسها وتعرف هي تستحق إيه ومتقبليش أقل من كده."

وأضافت ضاحكة:"لو شفت راجل بيضرب ست قدامي، أكيد هفكر أتدخل وأضربه، بس ساعات بخاف لأنها ممكن تكون راضية وتقولي أنتي مالك!"

وعن تعاونها المستمر مع أحمد مجدي، قالت: "اشتغلنا سوا في (الآنسة فرح) لمدة 3 سنين، وكنا مرتاحين في الشغل مع بعض. ولما اشتغلنا في (فات الميعاد) كان فيه نفس التفاهم، والفرق الوحيد كان في أسماء الشخصيات."

وتطرقت إلى أحدث أعمالها، مشيرة إلى مسلسل جديد بعنوان "مملكة الحرير"، حيث تؤدي شخصية الأميرة جليلة، وقالت: "المسلسل فانتازيا ومليان تشويق. الشخصية مختلفة جدًا وأنا استمتعت بالتجربة. يا رب تعجب الجمهور."

كما كشفت عن مشاركتها في فيلم بعنوان "الغربان"، الذي يدور في حقبة زمنية مختلفة، مؤكدة حبها للأعمال التاريخية.

واختتمت اللقاء بسؤال افتراضي: "لو عملت برنامج إذاعي، أول ضيف أحب أستضيفه هو أحمد زكي، وهسأله سؤال واحد بس: (إنت عامل إيه بجد؟)"

وأضافت ممازحة:"ومبحبش أوي لما حد يسألني حضرتي إزاي للشخصية.. بحس السؤال ده صعب أوي يتشرح!"