"لو عندك أوراق قدمها".. شوبير يهاجم مسؤولي الزمالك بسبب تحركاتهم ضد زيزو

شن الإعلامي أحمد شوبير هجوما حاداً على مجلس إدارة نادي الزمالك، بسبب ملاحقة أحمد سيد زيزو منذ انتقاله إلى النادي الأهلي.

وقال شوبير في تصريحات إذاعية: «بقالنا فترة كبيرة بنكلم على زيزو وقضيته مع ناديه السابق الزمالك، لكن إمبارح كان الزمالك في اتحاد الكرة للرد على شكوى زيزو، وهى القصة باختصار زيزو بيقول إنه له مستحقات عند الزمالك 83 مليون جنيه والزمالك بينفي وبيقول إن اللاعب مديون للنادي الأبيض بأكثر من 20 مليون جنيه».

وتابع: " الزمالك تواجد امبارح في اتحاد الكرة طلب تأجيل شهر لتجهيز المستندات، وأنا بصراحة استغربت جدًا ما أنت بقالك كثير ما جهزتش ورقك وردودك ليه».

واردف: "أنت بقالك فترة بتقول لجماهير الزمالك لديك الأوراق والأسانيد التي تؤيد موقفك في قضية زيزو طيب ما قدمتهاش ليه، عشان تقفل الموضوع فهل أنت جاهز ولا مش جاهز عشان نعرف القصة والحدودتة عاملة إزاي، وبعدين أنت دلوقتي في شهر أكتوبر وبعده فيه توقف دولي وبعده بطولة أفريقيا فعايز أعرف الدنيا ماشية إزاي والحدودتة ماشية إزاي".

واكمل شوبير: "أتمنى الزمالك في الشهر ده يقدم أوراقه ويكسب قضيته كمان، أو يعلن بصراحة ويقول يا جماعة أنا معنديش أوراق إنما هنفضل نشغل الرأى العام بأمور مش متأكدين منها أمر صعب جدا جدا يعني».