رامي عادل إمام عن والده: أبسط واحد في اللوكيشن وتجربتي معاه يشهد عليها الجميع

كشف المخرج رامي إمام، خلال حواره مع الإعلامي عبد العزيز أحمد، عن كواليس عدد من أعماله الفنية وتجربته مع كبار النجوم، متحدثًا بنص تصريحاته دون إضافات.

وقال رامي إمام، في تصريحات تليفزيونية ببرنامج الإعلامي عبد العزيز أحمد المذاع عبر قناة الظفرة: «أنا عملت أعمال كتير منها أمير الظلام، وجميع المسلسلات اللي فيها أكشن ودراما، لكن دايمًا لما الناس توقفني في الشارع تسألني عن غبي منه فيه، وفين الجزء التاني».

وتحدث رامي إمام عن بعض أعماله السينمائية قائلًا: «كمان فيلم 1/8 دستة أشرار، الفيلم ده من أحلى الأفلام اللي قريبة لقلبي، التجميعة دي مكنتش متواجدة سنة 2006، وكان فيه روح حلوة، والأجواء واللوكيشنز كانت حلوة، وياسمين عبد العزيز إنها تقول نجيب نيكول سابا تبقى موجودة علشان تضيف كفنانة في ناحية الجمال البلدي اللي بتلعبه».

وعن تعاونه مع والده الفنان عادل إمام، أوضح: *«الشغل مع عادل إمام مش مختلف عن الشغل مع الناس الكبار، لأن في الأول وفي الآخر كل فنان ليه توجه وفكر معين، هو أبسط واحد موجود في اللوكيشن، وبيتقبل توجهات المخرج، وبييجي بدري، وتجربتي معاه الناس كلها تشهد عليها».

وأضاف: «العراف من أحلى الأعمال، والناس في الشارع بتكلمني عن صاحب السعادة قد إيه مأثر فيهم».

وعن أفلامه المفضلة لوالده الفنان عادل إمام، قال: «بحب أشوف له فيلم المشبوه، ده من أكتر الأفلام اللي بحبها، لأني عارف كواليسه وإزاي كان تحدي إن والدي يعمله، وصعب النهاردة تجمع بين سعاد حسني وعادل إمام، الأداء التمثيلي ده حاجة تتدرس».