بعد مسلسل لا ترد ولا تستبدل.. دينا الشربيني تودع رحلتها مع "ريم" بكلمات مؤثرة

بقلبٍ يملؤه الامتنان وعينين رأت في "اللوكيشن" بيتاً ثانياً، شاركت الفنانة دينا الشربيني جمهورها تفاصيل رحلتها الصادقة مع شخصية "ريم"، في مسلسلها الأخير (لا ترد ولا تستبدل)، معبرة عن عمق الروابط التي جمعتها بفريق العمل، ومحولة نجاحها الدرامي إلى رسالة حب ومؤازرة لكل من يواجه تحديات المرض.

وكتبت دينا الشربيني، عبر حسابها الشخصي بموقع إنستجرام: مش عارفة أبتدي منين ولا أوصف مشاعري إزاي، رحلة لا ترد ولا تستبدل خلصت، بس الأثر اللي سابته جوايا والذكريات اللي عشتها فيها محفورة في قلبي للأبد.

وتابعت: عايزة أقول من كل قلبي إن دي كانت من أجمل وأصدق الكواليس اللي عشتها في حياتي، مكنش مجرد لوكيشن تصوير، كنا عيلة حقيقية، بنخاف على بعض وبنسند بعض في كل لحظة، مريم أبو عوف الأستاذة، المايسترو، والأخت اللي بتطبطب برؤيتها، شكرًا على اهتمامك المرعب بكل تفصيلة، وشكرا إنك خلقتي لينا عالم آمن ومريح قدرنا نطلع فيه كل مشاعرنا بصدق.

وأضافت: السعدني.. أخويا وعشرة العمر ورفيق الرحلة، الكلام في حقك مش كفاية، ودايمًا وشنا حلو على بعض وبنطلع أحلى ما عندنا سوا، يارب دايمًا ناجحين مع بعض، كل طاقم العمل، بشكركم واحد واحد من قلبي، أنتوا بجد عيلتي اللي بفتخر بيها وبحترم تعبها وشطارتها.

ووجهت دينا الشربيني، رسالة لـ مرضى الفشل الكلوي، قائلة: رسالة خاصة من جوة قلبي لكل حد ربنا اختبره بالمرض، أنتم الأبطال الحقيقيين، ابتلاء كبير بس أنتم قدها، إحنا بنتعلم منكم الصبر والقوة والرضا، كلنا في ضهركم وبندعمكم، وبإذن الله ربنا يكتبلكم الشفاء التام. 

واختتمت: أخيرًا.. الجمهور العظيم أنا بقرأ كل كلمة وكل حرف بتكتبوه، ومبسوطة وطايرة من الفرحة بكل ردود أفعالكم وتفاعلكم مع قصة "ريم" ووجعها وأملها، شكرًا إنكم حسيتوا بينا ووصلكم صدقنا، المسلسل ده علمني إن الصحة تاج حقيقي، وإن الحب الصادق والمواقف النبيلة هما بس اللي باقيين في الآخر.