رسائل الرئيس السيسي خلال تفقد تطوير ميناء الإسكندرية

أدلي الرئيس عبد الفتاح السيسي، بعدة تصريحات مهمة، اليوم الثلاثاء خلال تفقد أعمال تطوير ميناء الإسكندرية البحرى.

وترصد "الحصاد مصر" في السطور التالية أبرز تصريحات الرئيس السيسي:

طمأن الرئيس عبد الفتاح السيسي، المستوردين بخصوص الإجراءات الجديدة والتي ستطبق بداية من مارس 2022، قائلا: "بقول للمستورد مش هغلبك معايا ومش هيحصل الكلام اللى كان قبل كدة.. المنظومة المالية طورناها بالميكنة الكاملة بدليل حجم المليارات التى أنفقت في هذا الأمر، وقلت للدولة منذ 4 سنوات لو تقدروا تعملوا ميكنة لكل الأنشطة علشان نحيد العمل البشرى وإجراءاته، ولو عاوزين 100 مليار جنيه حد يقولى تدفع 100 مليار في ميكنة؟".

وأضاف الرئيس: "المستورد خاطب الشركة، والشركة خاطبت الجمارك، ولو تم الموافقة نحدد الأسعار بتاعها ونسب كبيرة جدا منها حتى لن يتم الكشف عنها مع منظومة الإكس راي، ويبقى فيه انتقاء عشوائى للبعض.. رحت من 5 سنين سنغافورة لقيت الطقم اللى مشغل الميناء 8 أفراد ورايحين لده إن شاء الله.. بنعمل الإجراءات دى علشان نعمل حاجة فيها انضباط وشفافية كبيرة جدا..الخطوة اللى هنخدها قدام لا فيها وقوف ولا رجوع".

وقال الرئيس عبد الفتاح السيسي، إن الدولة ليس لديها أي مشكلة في الاستعانة بالمستثمرين والخبراء في تطوير كافة المنظومات بالدولة، الأمر الذي يساعد على عملية التطوير.

وأوضح السيسي، أن الدولة قادرة على إنجاز كافة متطلبات المشاريع حتى تتم بشكل سليم، ما يتيح فرص للمستثمرين وخلق فرص عمل جديدة داخل مصر.

وكشف الرئيس عبدالفتاح السيسي، أن تنفيذ الدولة للمشروعات بنفسها يوفر فرص عمل وتشغيل كثير للمواطنين، والوصول إلى معدلات التنمية المنشودة.

وأضاف: "مصر تريد منح الفرصة للمستثمرين والمطورين الدوليين لكن تعمل على تمهيد الطريق أولا تقصير المسافات، ثم يتم بعدها اختيار العرض الأفضل من المستثمرين، متابعا: "تخطيط ميناء الإسكندرية من 25 سنة وتنفذ منه الحوض الأول فقط".

وقال الرئيس عبد الفتاح السيسي: "إحنا عايزين نفكر نفسنا للناس اللي بتسمعنا.. احنا متفقين إننا عايزين نتكلم ونشتغل زي ما الدنيا كلها بتعمل كدا".

وأضاف الرئيس السيسي، "عاملين ميكنة كاملة لكل إجراءات صرف الضرائب أو فى الجمارك".

وتابع السيسي: كان اتفاقنا مع الدكتور محمد معيط والحكومة أن مارس 2022 آخر خط لكل الإجراءات.. أنا بقول الكلام دا علشان الشركات المعنية بالعمل دا تساعد الدولة".

وأعلن الرئيس عبدالفتاح السيسي، عن تكلفة تطوير ميناء الإسكندرية البحري تتراوح ما بين 25 إلى 30 مليار جنيه، مشيرا إلى أن الدولة تضع جداول زمنية من أجل الانتهاء من المشروعات في أوقات معينة

وأضاف الرئيس السيسي، خلال كلمته أثناء تفقده ميناء الإسكندرية البحري، اليوم الثلاثاء، أن طرح المشروعات والدخول في متاهات وعقود كان مسارا لم يحقق لنا ما نريد.

وأكد الرئيس عبدالفتاح السيسي، عدم السماح بدخول أى بضائع إلا طبقا للمعايير الأوروبية بداء من مارس 2022.

وقال الرئيس السيسي: "بقول الكلام ده علشان الشركات المعنية تساعد الدولة والحكومة في الإجراءات اللى بنعملها وهى هدفها تسهيل الأعمال وقدر ضخم من الشفافية، فضلا عن دولة بتتكلم زى ما الدول المتقدمة في التجارة بتعمل كده، لأنه النهاردة احنا شغالين فى حاجة اسمها المعايير الأوروبية علشان لن نسمح بدخول أى بضائع إلا طبقا للمعايير الأوروبية".

وتابع الرئيس السيسي: "مش هنقبل ان حاجة تخش، أى حد يستورد أى حاجة يبيعها للناس تشتغل أسبوع أو شهر وتترمى لا.. احنا هندخل كل البضائع اللى هتخش البلد طبقا للمعايير زى الدول المحترمة مبتشتغل.. حاجتنا من شركات محترمة علشان الناس اللى في مصر تشترى وهى مطمنة ومش هنسمح لأى مستورد أنه يجيب أى حاجة مش هانوافقله وكام شهر اللى فات كان عبارة عن إجراءات اختبارية، لكن من أكتوبر هنبدأ التجهيز للتطبيق، وبدءا من مارس 2022 سيتم تطبيق المعايير اللى اتفقنا عليها، لكل البضائع اللى تخش مصر طبقا للمعايير الأوروبية، ويبقا ادينا فرصة للمستوردين لما يتعاقدوا على بضائع ومواد هيطبق عليها المعايير اللى بتكلم عليها، ولو مش هانبقا جاهزين في مارس 2022 قولولي".

وجه الرئيس عبدالفتاح السيسي، بتعويض أصحاب العقارات التي سيتم إزالتها خلف الميناء الأوسط" ميناء المكس"، قائلا: "لما اتكملنا في موضوع تعويض الناس كويس علشان الظهير الخلفى بتاع الميناء يبقا مؤمن".

وأشار الرئيس عبد الفتاح السيسي، إلى أن الدولة انتهجت سياسة مغايرة عما كان في السابق، فالدولة لها مسار مختلف ونستفيد حاليا من الموقع الجغرافى، مضيفا: "حبيت أقول الكلام ده علشان تعرفوا إنه كان فيه مسار لم يكن سيئا بس محتاجين معدلات عمل أكبر بكثير".

وأضاف الرئيس السيسي، أن الهدف من التطوير هو تنمية مصر ووضعها على الخريطة لإظهار قدراتها الحقيقية على البحر الأبيض والمتوسط"، مؤكدا أن الدولة تنفذ المشروعات حاليا من خلال إمكاناتها وتمويلها ونرحب أيضا بالمستثمرين، متابعا: "مصر باتت تعتمد على التمويل الذاتي في تنفيذ المشروعات الجديدة".