ياسمين عز: الراجل حتة آثار.. لو اتجوز عليكي وعاد معتذرًا بنقوله أهلًا"

حرصت الإعلامية ياسمين عز على توجيه النصيحة للسيدات كعادتها، بالتغاضي عن أخطاء أزواجهن واحتوائهم وعدم طلب الانفصال نهائيًا.

وقالت المذيعة ياسمين عز مقدمة برنامج كلام الناس عبر شاشة  قناة MBC مصر، :"مفاتيح الراجل تلاتة أمه وأخته وودنه وهعمل حلقة تانية عن أخته خصوصًا وهو عايز يسمع كلام طيب وحلو حتى لو غلطانة والزن على الودان أمر من السحر وهيشوفك ست الكل، ولو رجع والخطة نجحت وساب الزوجة التانية السؤال ليكي ماذا لو عاد معتذرًا؟ يا أهلا بيه والله يحيه هنرجع ونحافظ على بيتنا ومفيش كلمة طلاق".

وتابعت: "الراجل غلبان وغلط ورجع لصوابه والعتاب بعدين، متبقاش هي قاعدة رجلها في الشمس وأنتي وشك يكون قد اللقمة وتتمنعي عن الرجوع".

واستعانت ياسمين عز بـ مثل شعبي قديم، قائلة: "حطي جوزك فوق السطوح ولو ليكي نصيب فيه مش هيروح، وحرصي من القريب قبل الغريب ومينفعش جوزك يوصل صاحبتك لوحدك ومينفعش تثقي في حد غير في نفسك وأهلك ورقم جوزك متديهوش لحد ولا تقولي شغله فين ومتحكيش عن حلاوته لحد حتى الدليفري أطلبي من موبايلك.

وأكملت: " لأن واحدة ممكن تكلم المطعم وتحاول تجيب رقم جوزك، أي مكان فيه تجمع جوزك في إيدك لأنه فرعون وحتة آثار ولو رايحة الحمام خديه معاكي، ومتعزميش صاحبتك وتسبيها جنب جوزك وتروحي تجيبي العصير من المطبخ لأن بكرا هتروح هي تجيب الشربات ومينفعش تقولي الست مش ملزمة لأن هتيجي واحدة ملزمة تاخده منك وتفصص له السمك".