«لما أروح البحر لازم اقرأ قرآن أمامه ومش بستحمل التاتو».. تصريحات جرئية لفيفي عبده مع ياسمين عز

استضافت الإعلامية ياسمين عز الممثلة فيفي عبده خلال حلقة برنامج "كلام الناس" اليوم الأحد.

فيفي عبده تحدثت عن شخصيتها بمسلسل كيد النسا، وسر استجابة دعائها أمام البحر.

الحصاد مصر يرصد في  نقاط أبرز تصريحات فيفي عبده على النحو التالي:

عملت شخصية كيداهم بطريقتي الطبيعية.

طريقة كيداهم هى حقيقة تركيبتي وشخصيتي.

متعودة لما أروح البحر لازم اقرأ قرآن وأنا واقفة قدامه.

عشان أغسل همومي بنزل سبع موجات في البحر من غير نفس.

لما قعدت فترة من غير شغل رحت قدام البحر ودعيت ربنا لقيت المنتج بيكلمني.

مفيهاش حاجة لما حماتك تاخد مفتاح الشقة طالما بنية سليمة.

أى زوج اتجوزته كنت بعامل أمه زى أمي بالظبط.

مفيش حاجة اسمها جوزك يوصل صحبتك عشام ممكن تكون بترسم عليه.

الست مينفعش تقول أسرار بيتها لأى حد مهما كان.

الرئيس عمل قوانين جديدة للزواج عشان الراجل يدفع قبل ما يتجوز.

الراجل بتعجبه الست اللي بتطلع عينه ويتعب عشانها عشان يعرف قيمتها.

حلي مشاكلك مع جوزك في الأوضة واديله فرصه أكتر من مرة وفي الآخر دخلي أهله.

حياتي اتغيرت للأحسن بعد مسلسل كيد النسا والدنيا اتفتحت.

كل كلامي في مسلسل كيد النسا كان من تأليفي.

مش بستحمل أعمل تاتو على جسمي، وعايزة أعمل ميكروبليدنج بس خايفة.

بقيت بطلع للناس من غير حواجبي عشان كانوا بيذلوني بعد حلقتي مع رامز.

شخصيتي قوية، لكن الراجل هو سي السيد ولما يبقى ملوش لازمة مش هيملى عنيا.

الراجل لازم يكون متزن وسي السيد جوه البيت وبره عشان يملى دماغي.

المفروض نستغل السوشيال ميديا في حاجات مهمة مش في الفضايح.

لو الراجل اتهان منك أو اتجرح مش هيرجعلك تاني، ونسب الطلاق ارتفعت جدًا.

2022 كان مرها أكتر من حلوها، واختين ماتوا ورا بعض.

نفسي في 2023 يجيلي في ورق كويس وأقدم حاجة مختلفة مش تقليدية.

اتحسدت وكل ما أخرج أى خروجة أرجع أنام بعدها 20 يوم.

دخلت التيك توك عشان أقول للناس إني عايشة بعد شائعات وفاتي.

مش بيهمني التعليقات الوحشة، وبحب انستجرام أكتر من الفيس بوك.

طلبت الطلاق عشان زوجي علّى صوته عليا قدام صحابه وجابهم واعتذرلي.

بلعب مع جوزي كوتشينه على فلوس عشان أعرف بخيل ولا سخي.