أول رد من المخرج عمرو سلامة على أزمة بيومي فؤاد ومحمد سلام

علق المخرج عمرو سلامة - بشكل غير مباشر- على الهجوم الذي تعرض له الفنان بيومي فؤاد، بسبب تصريحاته الأخيرة في موسم الرياض، والتي انتقد فيها الفنان محمد سلام.

 
وكتب عمرو سلامة في تدوينة مطولة عبر حسابه على موقع إكس (تويتر سابقا): "مهما غلط أي إنسان، ومهما اختلفت شخصيا معاه أو انتقدت مواقفه، غصب عني بتعاطف معاه بشدة لو حصل عليه هجوم جماعي، الناس اللي بتهاجم أحيانا مش بتحس بحجم تأثير كلامها لإنهم مش بيشوفوه بشكل مباشر، وأنا متأكد لو شافوا بعيونهم حجم الحزن والقهر والألم اللي بيعدي بيه أي شخصية عامة، وهو محطوط على الجريل، هيفكروا مرتين في هجومهم أو حتى في نوع الهجوم أو نبرته.

أضاف:  أنا من واقع حياتي شوفت اللي بيعيط واللي بيخش في نوبات اكتئاب ونوبات فزع، وشوفت حتى اللي حاول ينتحر، وساعات ده بيكون سبب إنه مجرد قال رأي مش موفق، أو تحمس لموقف متسرع، أو اتفهم غلط، أو خد موقف مش حاسب تبعاته، أو قال رأي مش واخد ختم النسر من دول أو من دول.

تابع:  أنا شخصيا عشت ده كذا مرة، ساعات لآراء بعد سنة راجعتها، وساعات لتهريج اتفهم إنه جد، وساعات لاندفاع عاطفي برأي لو كنت قولته على القهوة كان اتنسى بعدها بربع ساعة، في الأول كان حجم الألم قاسي، ودلوقتي لسة برضه بيكون قاسي بس اتعلمت شوية سبل للتعامل معاه.

واصل:  طبعا الناس من حقها تقول رأيها في أي شيء وكل شيء، وآه "من قبل العمل العام تبرع بنصف عرضه" بس قليل من العقل والرحمة والتعاطف مش هيضروا حد، كلمة كتبتها ورمتها كده وانت غضبان ممكن تخلي حد ينام مجروح أو يخاف على أهل بيته أو يفكر ينتحر، وأكيد لو إنت إنسان متحبش تكون سبب في ده.

 وأخيرا، إحنا في وقت عيب تكون الخناقة على أي حاجة غير الخناقة الأكبر. والله أعلم".