أحمد حلمي: سناء منصور هي التي اكتشفت موهبتي في التقديم

حل الفنان أحمد حلمي ضيفاً على برنامج "Sold out" الذي يقدمه الإعلامي محمود سعد، وتحدث عن بدايته مع الأطفال، وكشف عن أن الأستاذة سناء منصور رئيس القطاع الفضائي هي التي اكتشفت موهبته في التقديم.

وقال حلمي: "قابلت صديقي محمد خلف في التليفزيون، وكان بيشتغل في الإخراج، وقالي تعالى اشتغل في التليفزيون، روحت واخد ميعاد عشان أقابل سناء منصور، قعدت ساعتين تلاتة ومعرفتش أقابلها، وعرفتها إني خريج ديكور، وقالتلي طيب اشتغل يلا، عرفتها إني عاوز اشتغل في الإخراج، وقالت لمحمد خلف انزل معاه مساعد، وهو كان بيخرج برنامج أطفال اسمه أحلام العصافير، وقالتله خده معاك يساعدك، وبدات أنزل معاه مساعد".

وأضاف: "لغاية لما في أوردر مسكت الميكرفون وروحت متكلم مع طفل، والمصور صوره ومحمد خلف قالي نوريه لسناء منصور، ولما شافته ضحكت كتير فانبسطت، وقالت أنا عايزة من الفكر دى 30 حلقة وكان شهر رمضان فاضل عليه أسبوعان فقط، فقلتلها ومين هيقدمه لإنى فاكر إنى هاخرجه، فقالتلى انت اللى هتقدمه ومحمد خلف هيخرجه".

وتابع: "بدأنا ننزل نصور بشكل مجنون مع أطفال كتير عشان نلحق نذيع 30 حلقة في رمضان، كنا بنروح أى حضانة واعمل أنا فيها زى المفتش، وادخل أعدى على كل فصل، وافتح واشوف الأولاد واشوف أكتر واحد هادي واخده بره أعمل معاه اللقاء، وكان أكتر حاجة بتبسطنى إن الأب والأم مش بيكونوا مصدقين إن ابنهم قال الكلام ده"