أنا في ضهر القضية الفلسطينية.. تامر حسني يرد على الحملة المثارة ضده بعد إعلان شيبسي

رد الفنان تامر حسني، على حملة الهجوم التي تعرض لها خلال الأيام الماضية، منذ عرض إعلانه الجديد لشركة شيبسي.

وقال "حسني"، عبر صفحتها على فيسبوك: "مساء الخير عليكم، بقالي يومين بتابع اللي بيحصل واحتراماً للجميع، أنا بوضح حاجه بخصوص إعلان شيبسي الأخير".

وذكر: " أولاً، أنا على قوة الشركة من سنتين، قبل أي أحداث، وده مش أول إعلان، ده ثالث إعلان في عقدي، معلش أحياناً الكلام عند بعض الناس بيبقى سهل، وتحديداً لما بيكون دون علم بالعقود وبحيثيات الموضوع كله".

وصرح قائلًا: "ثانيًا، أنا مضيت على عقد مكتوب فيه إن شيبسي  شركه مصرية، ولها سجل تجاري ضريبي مصري منفصل، والبند قدامكم أهوه لصدق كلامي"، مضيفًا: "ثالثًا، والأهم لأي حد بيشكك في انتمائي للقضية الفلسطينية، هقوله أنا من ٢٠ سنة، وأنا في ضهر القضية، ومش كلام وأغاني بس لا، أنا روحت بنفسي معبر رفح أثناء الضرب لمساندة أهالينا هناك بأكبر حملة".

وقال "حسني": "معتقدش في حد هيخاطر بحياته و يروح بنفسه معبر رفح أثناء الضرب مجامله مثلًا"، متابعًا: "أنا لما قررت أكون الوجه الإعلاني لشيبسي من سنتين لأنه منتج مصري كل المصريين بيحبوه، والبطاطس من الفلاحة المصرية، وبيتباع في مصر بس، واتربينا عليه والأهم إن الشخص البسيط يقدر يشتريه في ظل ظروفنا الاقتصادية، وأظن ده واضح في الإعلان".

وأكمل: "ده كان شعوري الشخصي اتجاه الحملة وأنا بمضيها من سنتين عشان كده كان واجب عليا التوضيح للجميع، وللّي مش وصلاله الصورة بكل احترام.. وشكراً لكل اللي ردوا عني وهما مغمضين حقيقي أنتوا نعمة كبيرة من ربنا، ألف شكر ورمضان كريم على الجميع".