محمد شاهين عن دوره في "لام شمسية": الناس كرهوني

أعرب الفنان محمد شاهين عن سعادته الكبيرة بردود فعل الجمهور على شخصية المتحرش وسام، التي يجسدها في مسلسل "لام شمسية"، والذي يُعرض حاليًا ضمن السباق الرمضاني 2025.

وأكد أن المسلسل حقق نجاحًا واسعًا منذ عرض أولى حلقاته.

وفي لقاء مع برنامج ET بالعربي، قال محمد شاهين: "في البداية كنت قلقان من رد فعل الناس في الشارع، لأنهم كانوا مصدقين الشخصية جدًا ووصلوا لمرحلة التعامل معها وكأنها حقيقية، لكن في نفس الوقت فرحت لأن ده معناه أني قدرت أقدم الدور بشكل مقنع، وكمان حسيت أني قدرت أوصل رسالة تفيد الناس."

تفاعل الجمهور مع مشاهد المسلسل

أشار شاهين إلى أن الجمهور كان يتفاعل بشكل كبير مع الأحداث، مضيفًا: "كل ما تحصل حاجة سلبية لشخصية وسام، الناس بتتعامل وكأنه ماتش كورة! شفت فيديوهات على السوشيال ميديا لمشاهد معينة بين يوسف ووسام، والناس كانت فرحانة ومتفاعلة جدًا، وده شيء أسعدني جدًا، لأنه يعني أننا وصلنا للجمهور بقوة."

كواليس قبوله للدور

وعن تردده في قبول الدور، كشف شاهين: "المخرج كريم الشناوي كان قالي على المشروع ده من سنة، وقت ما اشتغلنا مع بعض في مسلسل (الهرشة السابعة). جالي البيت وقالي: فاكر المشروع ده؟ أنا هعمله وأنت هتبقى معايا. وأنا بحترمه جدًا وبثق فيه، فوافقت على طول، من غير أي تردد، وكنت متحمس جدًا."

التحضير لشخصية وسام

تحدث شاهين عن كيفية بناء الشخصية قائلًا: "الشخصية اتكونت لوحدها مع الوقت، لكني قعدت مع الدكتورة سارة عزيز علشان أفهم الجوانب النفسية للمتحرش، خاصة فكرة إنه ممكن يكون شخص قريب من الضحية، مش بالضرورة يكون شخص غريب. وكريم الشناوي كان في ضهري طول الوقت، وكان بيساعدني في كل التفاصيل، لحد ما الشخصية وصلت للناس وكرهوها الحمد لله!"