لبلبة: عادل إمام لا يتكرر.. وعلاقتنا الفنية قائمة على التفاهم والاحترام

تحدثت الفنانة لبلبة خلال ندوتها المقامة ضمن فعاليات مهرجان أسوان الدولي لأفلام المرأة، عن مسيرتها الفنية الطويلة مع الزعيم عادل إمام، مؤكدة أنه فنان استثنائي لا يتكرر.

وقالت: "شاركت مع عادل إمام في 14 فيلماً، وهو فنان عنده كل حاجة مدروسة. التمثيل معاه بيكون سهل لأني بفهمه من نظرته، وهو كمان بيحس بيا. عمره ما غير من ممثل، دايمًا بيحب يساعد غيره يلمع ويظهر."

وأعربت لبلبة عن أمنيتها في التعاون معه مجددًا، قائلة: "بتمنى يجمعني بيه فيلم تاني دلوقتي، ولسه على تواصل معاه دايمًا، وبنحضر لعيد ميلاده اللي جاي يوم 17."

استياء من شائعات وفاة الزعيم: "كله كذب.. وهو بخير"

أبدت لبلبة استياءها الشديد من الشائعات المتكررة التي تطال عادل إمام، خاصة تلك التي تتعلق بصحته أو وفاته، مؤكدة أنه بخير ويتمتع بصحة جيدة.

وقالت: "بتضايق جدًا من الشائعات اللي بيقولوها عنه على السوشيال ميديا، لأنها غير حقيقية بالمرة، والزعيم كويس الحمد لله."

لبلبة ترد على شائعة تسممها بسبب الفسيخ: "أنا من الشعب وباكل فسيخ زيهم"

كما علّقت لبلبة بطرافة على شائعة إصابتها بالتسمم بعد تناولها الفسيخ في عيد شم النسيم، موضحة أن الفيديو الذي ظهرت فيه وهي تتناول الفسيخ كان بهدف المزاح فقط.

وقالت: "قالوا إن جالي تسمم علشان كلت فسيخ، بس أنا من الشعب، وباكل فسيخ زيهم."

وأضافت: "عملت الفيديو عشان أقول لأصحابي إني اتبسطت، وحاجات كتير معرفتش أعملها وأنا صغيرة بعملها دلوقتي. اللي صورني كان شاب صغير عنده 20 سنة، وقلت له: الناس هتشوفني باكل بصل هيقولوا عليّا إيه؟ بلاش فضايح!"

واختتمت بضحكة قائلة: "ما توقعتش الفيديو يبقى تريند."