شقيقة سعاد حسني ترد على عائلة عبد الحليم حافظ: الجواب مش خطها

كشفت جيهان عبد المنعم، شقيقة الفنانة سعاد حسني حقيقة زواج السندريلا، من المطرب عبد الحليم حافظ، مؤكدة بأن شقيقتها تزوجت بعده العندليب الأسمر، ثلاث مرات.

وأوضحت جيهان عبدالمنعم، خلال مداخلة هاتفية في برنامج "تفاصيل" على قناة صدى البلد 2: "إحنا سبق ورفعوا علينا قضية بسبب نفيهم خبر زواج حليم وسعاد واحنا كسبناها، وأنا نفسي أفهم هما بيعملوا كده ليه؟ عايزين يثبتوا إن سعاد كانت بتحب حليم من طرف واحد وهو مش بيحبها؟ ده كلام غير حقيقي".

وأوضحت أن العلاقة بين العندليب والسندريلا كانت متبادلة قائلة: "هما الاتنين حبوا بعض واتجوزوا في السر، وهما أحرار"، مضيفة الآتي : "حب حياة سعاد الحقيقي كان المخرج علي بدرخان، والقدر جمع بينهم حتى في الوفاة، لأنه هو كمان توفى في لندن زيها".

وواصلت :" "سعاد مكنتش راضية تقول إنها اتجوزت عبد الحليم، لكن في أواخر أيامها اتكلمت عن جوازهم السري، وقالت إنه كان فيه عقد في خزنتها، طيب هل كانت هتعمل عقد وتخليه في خزنتها لمجرد الذكرى، يعني كانت هتعمل كده ليه؟".

وزادت: "لما شوفت الجواب اللي بيقولوا إنه من سعاد لحليم، قلت فورًا ده مش خطها، وواضح جدًا إنه مش قديم، وبسأل سؤال: هل إحنا طالبنا بميراث علشان يطلعوا جواب زي ده؟".

وأكدت شقيقة السندريلا: "الفنانون ليهم خصوصيتهم وأسرارهم، ومعتقدش إن عبد الحليم كان هييجي يقول لابن أخوه الصغير إنه اتجوز سعاد".