"راعوا عقولنا".. شوبير يسخر من صفقات الزمالك

أحمد شوبير

سخر الإعلامي أحمد شوبير، نجم الأهلي والمنتخب الوطني السابق، من الشائعات المتداولة حول صفقات نادي الزمالك خلال فترة الانتقالات الصيفية الحالية، مشيرًا إلى أن الأمور تُدار داخل القلعة البيضاء بهدوء وبدون ضجيج.

وقال شوبير، خلال تصريحاته الإذاعية: "التعاقدات في الزمالك ماشية بهدوء جدًا، لكن لسه سامع من يومين حد بيقول إن الصفقة المقبلة لزمالك هي فينيسيوس البرازيلي! وبعدين يطلع يقول مش قصدي فينيسيوس بتاع ريال مدريد! طيب قصدك مين؟ محمد فينيسيوس؟ جونيور؟ أي فينيسيوس؟ ويقولك الصفقة دي هتكسر الدنيا! فبالراحة شوية وراعوا عقولنا".

وتابع شوبير: "زي ما زمان قالوا الزمالك هيضم رونالدينيو، وطلعت وقتها قلت مش معقول كده، إحنا مش بنهزر! الزمالك بيتحرك بهدوء، وضم صفقات كويسة زي عمرو ناصر، وأحمد شريف، وشيكو بانزا، والدنيا ماشية تاتا تاتا، ومدير الكرة سواء كان عبد الناصر محمد أو فريد شوقي أو أي حد، مش دي القضية.. المهم نسيب الناس تشتغل".

وأضاف: "الزمالك هذه المرة يُدير ملفاته بشكل هادئ ومنظم، وأنا أتحدى أي حد شاف جون إدوارد المدير الرياضي في أي لقاء أو تصريح.. الأمور ماشية بنظام، ومفيش انتصارات من غير نظام، ولو فيه نظام، النجاح مضمون".