"الزمالك عملك اسم وسعر".. قناة الأبيض تفتح النار على زيزو بسبب هشام نصر

شنت قناة الزمالك هجومًا حادًا على أحمد سيد زيزو لاعب الفريق السابق والمنتقل إلى النادي الأهلي، بعد تتويجه رفقة الأحمر بالأمس بالسوبر المصري ورفضه مصافحة هشام نصر عضو مجلس القلعة البيضاء.

وقال محمد أبو العلا في تصريحاته: "اللي لازم يتقال إن زيزو الفضل الكبير في اللي وصله ليه يرجع لنادي الزمالك، من أول ما محدش كان يعرفه لحد ما بقى نجم الدوري وأفضل لاعب في أفريقيا، كل ده لأنه كان لابس تيشيرت الزمالك، المشهد ده اتشاف في دولة تانية قدام مسؤولين كبار زي وزير الشباب والرياضة الدكتور أشرف صبحي وممثلي اتحاد الكرة، والمهندس هاني أبوريدة وكان لازم يبقى التصرف راقٍ ومحترم".

وأضاف: "سبق وشوفنا مواقف زي دي اتعاقب فيها لعيبة الزمالك، زي شيكابالا لما اتوقف بسبب أنه احتفل بالدوري، ودونجا لما اتوقف في بطوله بعينها بشكل قريب، لكن لما يبقى التصرف من لاعب تاني، الدنيا تسكت، وده بيخلينا نسأل عن المعيار المزدوج في العقوبات، الرسالة لزيزو واضحة: متنكرش أصحاب الفضل عليك، من غير نادي الزمالك ماكنش حد هيعرفك ولا كنت هتقدر تطلب الأرقام اللي بتطلبها النهارده. اللي عملك اسم وسعر هو جمهور الزمالك وتيشيرت الزمالك، اللي خلاك تلعب بطولات وتتحط في مكانة كبيرة، فمش من الطبيعي تنكر الجميل".