«بيقولي يابومة وضربني بالكبشة في وشي» بسمة ترفع دعوى خلع أمام محكمة الأسرة

" أنا غلطان إني اتجوزت يا بومة ياريتني ما سيبت أمي وأتجوزتك»، بهذا الكلمات رفعت بسمة دعوى خلع أمام محكمة الأسرة بمصر الجديدة، ضد زوجها الذي دوما يلقي عليها الاتهام بأنها زوجة مهملة وغير قادرة على تحمل مسؤولية المنزل والاهتمام به وبأطفالها وهي على العكس تماما  تعطي كل وقتها وطاقتها لبيتها فقط .

وأضاف بسمة في دعواها أمام محكمة الأسرة بمصر الجديدة :" متجوزة من 5 سنوات والده متوفي ومعندوش أخوات وبالتالي والدته كانت مهتمة بيه لدرجة فوق الوصف خصوصًا هو الولد الوحيد ليها.. وأن طبيعة شغله صعبة وبتطلب مجهود بدني كبير هو شغال مشرف على عمال في مواقع إنشائية جديدة.. وأحيانا بيبات فيها بالأسابيع في بداية جوازنا قبل ما نخلف كنت شاغلة نفسي بيه هو طول الوقت ومكنش عندي حاجة تانية تشغلني عنه وهو كان فرحان بده ومرتاح لحد ما جيبت توائم ورا بعض ومن هنا كل حاجة أتغيرت".

وأكملت الزوجة في دعواها :" بعد الخلفة المسؤولية زادت عليا من تربية الأطفال وتنظيف البيت والاهتمام بالأكل والغسيل ده غير الاهتمام بنفسي وبشكلي عشان أفضل ست حلوة وأعجب وميبصش برا والاهتمام كمان بوالدته واللي هي حماتي وأني أشوف احتياجاتها وطلباتها لأنها ست كبيرة وعايشة لوحدها كل ده بقي فوق دماغي وبقيت دايما مضغوطة وأوقات ببقي مش مركزة غصب عني وهو بدأ يلاحظ ده ومن هنا كانت المشكلة لما قالي« أمي كانت شايلة دور الأب والأم  وكل حاجة وانتي بومة.

واختتمت الزوجة في داعوها أمام محكمة الأسرة مصر الجديدة :" في مرة كنت مضبطة نفسي أني هقوم أطبخ قبل ما هو ييجي بـ3 ساعات وبعدها أقوم أخد دش وأستناه لكن اللي حصل وقتها أن أبني تعب وكان عمال يصرخ من العياط وفضلت قاعدة جنبة بحاول أهديه وأكله وكنت وقتها حاطة أكل بيتسلق علي النار ونسيته لما تحرق من كتر خوفي على ابني التعبان، قومت جري عشان أحاول الحقه في الوقت ده كان جوزي وصل قبل ميعاده ولقي الشقة مليانة دخان وأبني بيصرخ وشافني وأنا مبهدلة وهدومي مش نظيفة راح مسك كبشة الأكل وضربني بيها وقالي « يعني جاي تعبان وارجع الاقيكي حارقة الأكل وسايبة أبنك بيصرخ لا وكمان شكلك يقرف ومش مستحمية حرام عليك دايما مجوعاني أنتي ست مهملة .. من هنا كنت خلاص نفسيتي ادمرت تعبت من اتهامه ليا بالإهمال ومقارنتي بأمه رغم كل تعبي عشان وعشان ولادي قررت أخلعه في المحكمة عشان يعرف قيمتي ومستنية ربنا يرزقني براجل يعرف يقدرني ويقدر تعبي ويبقي حنين عليا ".