أمانى أمام محكمة الأسرة .. جوزي مش راضي يديني مصروف عن مستلزماتي

رفعت« أماني» دعوى طلاق للضرر أمام محكمة الأسرة مصر الجديدة اتهمت فيها زوجها برفضه منذ بداية زواجهما إعطاءها مصروفا شخصيا لها بجانب «مصروف البيت».

حكيت « أماني» في دعواها أمام محكمة الأسرة: قبل الجواز كنت حريصة جدا أني متجوزش راجل بخيل وأي حد يتقدم لي كنت لازم أتأكد الأول هو بخيل ولا لا، خصوصا أني من أسرة ميسورة الحال، وطول عمري عايشه مرتاحة عند أهلي وبالرغم أني كنت بشتغل بس كانوا هما بيصرفواعليا متكفلين بكل مصاريفي.

وأكملت الزوجة في دعواها: لما أتقدم لي زوجي أقنعني إني أسيب شغلي لأني مش محتاجه في حاجة خصوصا إن حالته المادية كويسة جدا وبيشتغل مع والده في التجارة فوافقت على أساس أنه يلبي كل احتياجاتي وفعلا مش هكون محتاجة الشغل.

واختتمت الزوجة أمام محكمة الأسرة : كان في الخطوبة بيجبلى كل حاجه أنا عايزاها في تجهيزات البيت وحتى بعد الجواز، كان بيتنا لا ينقصه شيء، ولما بدأت الحاجات الشخصية بتاعتى تخلص طلبت منه يديني فلوس «مصروف شخصي»، لكن رده كان صدمة بالنسبة لي، فقال لي أن ذلك ليس من حقي شرعا ولا قانونا، فأخبرته بأنني سأعود مرة أخرى لشغلي حتى أتمكن من الإنفاق على احتياجاتي ومستلزماتي لكنه رفض رفضا تاما وقال لي إنتي شغلك إنك تقعدي في البيت تشوفي طلباتي وطلبات بيتك وبس مفيش نزول من البيت.

وعندما طلبت الطلاق رفض وساومني على التنازل عن كل حقوقي الشرعية. وهو ما دفعني للتوجه إلى للمحكمة وإقامة دعوى طلاق للضرر.