عن واقعة هوج بول.. أحمد موسى: الناس مش بتتعلم بتروح لنصاب برجلها| فيديو

علق الإعلامي أحمد موسى، عن كشف قضية نصب عبر تطبيق هوج بول، قائلًا إن الفترة الماضية شهدت جدلًا حول التطبيق، مؤكدًا على أن القائمين على هذا التطبيق ينصبون على المواطنين.

وذكر «موسى»، خلال برنامج «على مسئوليتي»، المذاع عبر قناة قناة صدى البلد: «الناس اللى اتنصب عليها مش بتتعلم، وهي اللي بتروح للنصب لوحدها، ده النصب المرة دي عن طريق جهاز أو تليفون وهمي لا تعرفه سواء في الداخل أو الخارج، دي ناس عايزة تكسب فقط، وعايزة تأخذ أرباح وهي قاعدة حاطة إيدها على خدها».

وأضاف: «محدش ضربك على إيدك، أنت اللي روحت للمكان ده بإرادتك الحرة، الناس سعيدة بتحويل 18 جنيه، وحد تاني مبسوط بألف جنيه»، شاكرًا وزارة الداخلية، على سرعة القبض على العصابة التي استخدمت هذا التطبيق.

وقال «موسى»: «عندنا جهاز مصرفي، الموضوع ده في ناس باعت ذهبها، وعملت قروض، وناس ماتت وناس جالها ذبحة صدرية، المنصة دي شغالة من شهر أغسطس الماضي، وحتى نهاية شهر فبراير، المستريح انت بتروح له وأنت عارفه، كمان الناس بتروح لوحدها للنصب برجلها، وبعد كده تقول اتنصب علينا وتقول إلحقونا».

وصرح بأن المواطن لا يعرف مخاطر التعامل مع مثل هذه المنصات، والهدف فقط هو الحصول على الأرباح، مشيرًا إلى أن البنك المركزي أصدر قرارًا بتجريم مثل هذه التطبيقات والأفعال، متسائلًا: «هو لسه في ناس كده بيضحك عليها بالطريقة دي».