نجلاء بدر: المتحرشون كاللصوص وكثير منا تعرض للتحرش اللفظي والجسدي

علّقت الفنانة نجلاء بدر على واقعة فتاة الأتوبيس التي اتهمت أحد الشباب بالتحرش بها، مؤكدة أن كثيرًا من الفتيات يتعرضن لمثل هذه المواقف دون القدرة على إثباتها أو الحديث عنها.

وعبر صفحتها بموقع فيسبوك: علق نجلاء بدر قائلة: عارف ليه الناس كلها دافعت عن البنت رغم إن الواقعة صعب تتثبت؟ لأن كتير مننا اتعرض لكم هائل من التحرش اللفظي والجسدي والبصري وماعرفناش نثبته. المتحرش مش بيعمل فعلته قدام الكل، هو بيتصرف في الخفاء، زي الحرامي والنشال، يسرق بخفة إيد من غير ما حد يشوفه أو يحس بيه، وعلشان كده بيبقى صعب جدًا تمسك عليه دليل. كلمة قذرة في ودن بنت كفيلة تزرع الرعب جواها، ولمسة سريعة أو احتكاك متعمد ممكن يكون تحرش كامل بلحظة خاطفة.

وتابعت نجلاء بدر: اسأل أمك أو أختك أو بنتك، يمكن وقتها تفهم اللي صعب عليك تستوعبه. أو كمل دور “اللي مش شايف”، مع إن في ناس كتير اتعرضت لانتهاك وعايشين حوالينا، وأهلهم نفسهم ماقدروش يثبتوا اللي حصل. عارف ليه أوقات بنصرخ ونقول “حرامي”؟ علشان الناس تجري تمسكه، إنما لو قلنا “متحرش” محدش بيتحرك، وكأن اللي حصل حاجة عادية! دايمًا اللوم بيقع على البنت: اسكتي، استري نفسك، بلاش فضايح.

واختتمت نجلاء بدر: زي ما شفنا قبل كده، حتى في قضايا اغتصاب بيحاولوا يسكتوا الضحية، فطبيعي البنت تتردد تتكلم عن تحرش. ويفضل المتحرش ماشي بابتسامته الباردة المستفزة، وكأنه بيتحدى الجميع: “ورّيني بقى إزاي هتثبتي إني اتحرشت بيكي؟!”